Science Academies' Lecture Workshop on "Biotechnology: Impact on Biodiversity for Sustainable Development" @MSCBU

 

ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟରେ "ଜୈବପ୍ରଯୁକ୍ତିବିଦ୍ୟା: ଧାରଣକ୍ଷମ ବିକାଶ ପାଇଁ ଜୈବ ବିବିଧତା ଉପରେ ପ୍ରଭାବ" ବିଷୟ ଉପରେ ବିଜ୍ଞାନ ଏକାଡେମୀର ବକ୍ତୃତା କର୍ମଶାଳାର ଉଦଘାଟନୀ ସମାରୋହ ଅନୁଷ୍ଠିତ ହୋଇଯାଇଛି । ଜୈବପ୍ରଯୁକ୍ତି ବିଭାଗ ଦ୍ୱାରା ଆୟୋଜିତ ଏହି କର୍ମଶାଳା ବାଙ୍ଗାଲୋରସ୍ଥିତ ଭାରତୀୟ ବିଜ୍ଞାନ ଏକାଡେମୀ, ନୂଆଦିଲ୍ଲୀସ୍ଥିତ ଭାରତୀୟ ଜାତୀୟ ବିଜ୍ଞାନ ଏକାଡେମୀ ଏବଂ ଆଲ୍ଲାହାବାଦସ୍ଥିତ ଜାତୀୟ ବିଜ୍ଞାନ ଏକାଡେମୀ ଦ୍ୱାରା ପ୍ରାୟୋଜିତ ହୋଇଥିଲା । ଉଦ୍‌ଘାଟନୀ ସମାରୋହରେ ମୁଖ୍ୟ ଅତିଥି ଭାବରେ ଯୋଗଦେଇ ବିଶ୍ୱବିଦ୍ୟାଳୟ କୁଳପତି ସନ୍ତୋଷ କୁମାର ତ୍ରିପାଠୀ ତାଙ୍କ ଭାଷଣରେ ଜୈବବିବିଧତା ସଂରକ୍ଷଣରେ ଜୈବପ୍ରଯୁକ୍ତିର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ । ପ୍ରଫେସର ତ୍ରିପାଠୀ ପ୍ରଥମ ଥର ପାଇଁ ଏଭଳି ଏକ କର୍ମଶାଳା ଆୟୋଜନ ହୋଇଥିବାରୁ କରିବାକୁ ଖୁସି ପ୍ରକାଶ କରିଥିଲେ ଏବଂ ଭବିଷ୍ୟତରେ ବିଶ୍ୱବିଦ୍ୟାଳୟକୁ ଶିଖରରେ ପହଞ୍ଚାଇବା ପାଇଁ ଏଭଳି କର୍ମଶାଳା ଆୟୋଜନ ଉପରେ ଗୁରୁତ୍ୱାରୋପ କରିଥିଲେ । ସ୍ନାତକୋତ୍ତର ପରିଷଦର ଅଧ୍ୟକ୍ଷ ପ୍ରଫେସର ହେମନ୍ତ କୁମାର ସାହୁ ଏହି କାର୍ଯ୍ୟକ୍ରମର ଅଧ୍ୟକ୍ଷତା କରିଥିଲେ । ଆଇଆଇଟି ଖଡ଼ଗପୁରର ପ୍ରଫେସର ତଥା କର୍ମଶାଳାର ଆବାହକ ପ୍ର. ନିରୁପମା ମଲ୍ଲିକ ବକ୍ତୃତା କର୍ମଶାଳାର ବିଷୟବସ୍ତୁ ଉପରେ ଆଲୋଚନା କରିଥିଲେ ଏବଂ ଯୁବ ପିଢ଼ି ପାଇଁ ଏପରି କର୍ମଶାଳାର ଗୁରୁତ୍ୱ ଉପରେ ଆଲୋକପାତ କରିଥିଲେ । ଜୈବପ୍ରଯୁକ୍ତି ବିଭାଗର ମୁଖ୍ୟ ତଥା କାର୍ଯ୍ୟକ୍ରମର ସଂଯୋଜକ ପ୍ରଫେସର ବିଶ୍ୱଜିତ ରଥ ଅତିଥି ପରିଚୟ ତଥା ସ୍ୱାଗତ ଭାଷଣ ପ୍ରଦାନ କରିଥିଲେ କର୍ମଶାଳାର ଉଦ୍ଦେଶ୍ୟ ଓ ଆଭିମୁଖ୍ୟ ସମ୍ପର୍କରେ ଆଲୋଚନା କରିଥିଲେ । ଭାରତୀୟ ଜାତୀୟ ବିଜ୍ଞାନ ଏକାଡେମୀର ସମ୍ମାନଜନକ ବୈଜ୍ଞାନିକ ପ୍ରଫେସର ଏମ୍. ସଞ୍ଜପ୍ପା, ଫକୀରମୋହନ ବିଶ୍ୱବିଦ୍ୟାଳୟର ପୂର୍ବତନ-କୁଳପତି ପ୍ରଫେସର ଶିବପ୍ରସାଦ ଅଧିକାରୀ, ଉତ୍କଳ ବିଶ୍ୱବିଦ୍ୟାଳୟର ପୂର୍ବତନ ପ୍ରଫେସର ଜୈବପ୍ରଯୁକ୍ତି ଏବଂ ପ୍ରାଣୀ ବିଜ୍ଞାନ ବିଭାଗ ପ୍ରଫେସର ଜି.ବି.ଏନ୍. ଚୈନି ଏବଂ ନେହୁ ଶିଲଂର ଉଦ୍ଭିଦ ବିଜ୍ଞାନ ବିଭାଗର ପ୍ରଫେସର ଏସ୍.କେ. ବାରିକଙ୍କ ସମେତ ବିଶିଷ୍ଟ ବକ୍ତାମାନେ ବତ୍କୃତା ପ୍ରଦାନ କରିଥିଲେ । ବିଭାଗୀୟ ପ୍ରଫେସର ସୁକାନ୍ତ କୁମାର ନାୟକ ଧନ୍ୟବାଦ ଅର୍ପଣ କରିଥିଲେ । ଏହି କର୍ମଶାଳା ଅତ୍ୟାଧୁନିକ ଗବେଷଣା ଉପରେ ଜ୍ଞାନ ଆଦାନପ୍ରଦାନ ଏବଂ ଆଲୋଚନା ପାଇଁ ଏକ ଆକର୍ଷଣୀୟ କ୍ଷେତ୍ର ପ୍ରଦାନ କରିଥିଲା, ଯାହା କ୍ଷେତ୍ରର ଉନ୍ନତି ଉପରେ ବିଚାର ବିମର୍ଶ କରିବା ପାଇଁ ବିଶେଷଜ୍ଞ ଏବଂ ବିଦ୍ୱାନମାନଙ୍କୁ ଏକତ୍ର କରିଥିଲା । ଏହି କାର୍ଯ୍ୟକ୍ରମକୁ ଡକ୍ଟର ସନ୍ତୋଷ କୁମାର ସାହୁ, ଡକ୍ଟର ଗୁଣନିଧି ଧାଙ୍ଗଡ଼ାମାଝୀ, ଗୁରୁପ୍ରସାଦ ଦୋରା, ରଶ୍ମି ପ୍ରଧାନ ପ୍ରମୁଖ ସଂଯୋଜନା କରିଥିଲେ । ଏହି ଦୁଇ ଦିନିଆ କର୍ମଶାଳାରେ ପ୍ରାୟ ୨୦୦ ଜଣ ବିଶ୍ୱବିଦ୍ୟାଳୟର ସ୍ନାତକୋତ୍ତର ଛାତ୍ରଛାତ୍ରୀ, ଗବେଷକଗଣ ଓ ୮ଟି ଅନୁବନ୍ଧିତ କଲେଜର ସ୍ନାତକ ଛାତ୍ରଛାତ୍ରୀମାନେ ଯୋଗ ଦେଇଥିଲେ । ଉଦଘାଟନୀ ଅଧିବେଶନରେ ବିଶ୍ୱବିଦ୍ୟାଳୟର ଅଧ୍ୟାପକ, ଗବେଷଣା ବିଦ୍ୱାନ ଏବଂ ଛାତ୍ରଛାତ୍ରୀମାନେ ଯୋଗ ଦେଇଥିଲେ