ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟରେ ଏକ ୧୫-ଦିନିଆ ମ୍ୟାଲେରିଆ ନିରୀକ୍ଷଣ କାର୍ଯ୍ୟକ୍ରମ ଉଦ୍ଘାଟିତ ହୋଇଯାଇଛି । ବିଶ୍ୱବିଦ୍ୟାଳୟର ଜୈବପ୍ରଯୁକ୍ତି ବିଭାଗ ଓ ବାରିପଦା ପିଆରଏମ ମେଡିକାଲ କଲେଜର ମଲ୍ଟିଡିସିପ୍ଲିନାରୀ ୟୁନିଟର ମିଳିତ ସହଯୋଗରେ ଏହି ନିରୀକ୍ଷଣ କାର୍ଯ୍ୟକ୍ରମକୁ କୁଳପତି ପ୍ରଫେସର ପ୍ରମୋଦ କୁମାର ଶତପଥି ଉଦ୍ଘାଟନ କରିଥିଲେ । ପ୍ରଫେସର ଶତପଥି ନିଜ ବକ୍ତବ୍ୟରେ ଜନସ୍ୱାସ୍ଥ୍ୟ ଏବଂ ସମାଜ କଲ୍ୟାଣ ପ୍ରତି ବିଶ୍ୱବିଦ୍ୟାଳୟର ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ ଏବଂ ଜାତୀୟ ମ୍ୟାଲେରିଆ ନିରାକରଣ କାର୍ଯ୍ୟକ୍ରମର ଐତିହାସିକ ଗୁରୁତ୍ୱ ଓ ସମଗ୍ର ଭାରତରେ ମ୍ୟାଲେରିଆ ମାମଲା ହ୍ରାସ କରିବା ଉପରେ ଏହାର ପରିବର୍ତ୍ତନକାରୀ ପ୍ରଭାବ ଉପରେ ଆଲୋକପାତ କରିଥିଲେ । କାର୍ଯ୍ୟକ୍ରମ ସଂଯୋଜକ ତଥା ଜୈବପ୍ରଯୁକ୍ତି ବିଭାଗର ସହଯୋଗୀ ପ୍ରଫେସର ଡକ୍ଟର ଗୁଣନିଧି ଧାଙ୍ଗଡ଼ାମାଝୀ ମ୍ୟାଲେରିଆର ପ୍ରସାର ନିୟନ୍ତ୍ରଣରେ ନିରୀକ୍ଷଣର ଗୁରୁତ୍ୱାରୋପ କରିବା ସହ ପ୍ରାରମ୍ଭିକ ଚିହ୍ନଟ ହିଁ ପ୍ରଭାବଶାଳୀ ଚିକିତ୍ସା ଏବଂ ପୁନଃସଂକ୍ରମଣକୁ ରୋକିବାର ଚାବିକାଠି ବୋଲି କହିଥିଲେ । ସେ କ୍ୟାମ୍ପସରେ ଜ୍ୱର କିମ୍ବା ସନ୍ଦେହଜନକ ମ୍ୟାଲେରିଆ ଲକ୍ଷଣ ଅନୁଭବ କରୁଥିବା ସମସ୍ତ ବ୍ୟକ୍ତିଙ୍କୁ କାର୍ଯ୍ୟକ୍ରମ ସମୟରେ ପରୀକ୍ଷା କରିବାକୁ ଅନୁରୋଧ କରି କହିଥିଲେ । ବିଭାଗୀୟ ମୁଖ୍ୟ ପ୍ରଫେସର ସୁକାନ୍ତ କୁମାର ନାୟକ ଏପରି ପଦକ୍ଷେପର ଆବଶ୍ୟକତା ଉପରେ ଗୁରୁତ୍ୱାରୋପ କରି ଏହାର ପ୍ରଭାବକୁ ରୋକିବା ପାଇଁ ମ୍ୟାଲେରିଆ ସଂକ୍ରମଣ ଋତୁରେ ପ୍ରତିବର୍ଷ ସମାନ କାର୍ଯ୍ୟକ୍ରମ ଆୟୋଜନ କରିବାକୁ ସୁପାରିଶ କରିଥିଲେ । ବିଭାଗୀୟ ପ୍ରଫେସର ବିଶ୍ୱଜିତ ରଥ ନିଜ ବକ୍ତବ୍ୟରେ ପ୍ରତିରୋଧ ଚିକିତ୍ସା ଅପେକ୍ଷା ଭଲ ବୋଲି କହିବା ସହ ବିଶ୍ୱବିଦ୍ୟାଳୟର ଏହି ପ୍ରୟାସ ଜାତୀୟ ଜନସ୍ୱାସ୍ଥ୍ୟ ଏଜେଣ୍ଡାରେ ଯୋଗଦାନ ଦେଇ ନିରୀକ୍ଷଣକୁ ସୁଦୃଢ଼ କରିବା ଏବଂ ସମୟୋଚିତ ହସ୍ତକ୍ଷେପ ସୁନିଶ୍ଚିତ କରିବା ଦିଗରେ ଏକ ପଦକ୍ଷେପ ବୋଲି କହିଥିଲେ । ସର୍ବାଧିକ ପ୍ରସାରଣ ଋତୁରେ ବିଶ୍ୱବିଦ୍ୟାଳୟ ପରିସରରେ ମ୍ୟାଲେରିଆ ଚିହ୍ନଟ ଏବଂ ନିରୀକ୍ଷଣ ନିମନ୍ତେ ଏହି ଉଦ୍ଦିଷ୍ଟ ଏହି କାର୍ଯ୍ୟକ୍ରମ ଆଗାମୀ ସେପ୍ଟେମ୍ବର ୨୭ ତାରିଖ ପର୍ଯ୍ୟନ୍ତ ଚାଲିବ । ଉଦ୍ଘାତନୀ କାର୍ଯ୍ୟକ୍ରମରେ ପ୍ରଫେସର ପୁଷ୍ପାଞ୍ଜଳି ପରିଡା, ପ୍ରଫେସର ପ୍ରଭଞ୍ଜନ ମଲ୍ଲୈକ, ଡ. ସନ୍ତୋଷ କୁମାର ସାହୁ, ଡ. ଶୁଭେନ୍ଦୁ ଶତପଥୀ ଏବଂ ଡ. ସ୍ୱରୂପାନନ୍ଦ ବିଷୟୀଙ୍କ ସମେତ ଅନ୍ୟାନ୍ୟ ଅଧ୍ୟାପକ ଅଧ୍ୟାପିକା ଯୋଗଦେଇଥିଲେ ଏବଂ ବିଶ୍ୱବିଦ୍ୟାଳୟର ବିଭିନ୍ନ ବିଭାଗର ଉତ୍ସାହୀ ଛାତ୍ରଛାତ୍ରୀ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ ।
No comments:
Post a Comment